Бүгүн, 2026-жылдын 18-февралында Болот Мамбетов айыл өкмөтүнүн Төрт-Күл, Эшперов жана Ак-Сай айылдарынын тургундары менен райондук мекеме жетекчилеринин катышуусунда жеринде жолугушуу өткөрүлдү.

Жолугушууга Тоң райондук мамлекеттик администрациясынын башчысы – аким Б. Осмонов катышып, тиешелүү райондук мекеме жетекчилери менен биргеликте көтөрүлгөн маселелерди жеринде карап чыкты.

Жыйындын негизги максаты – жергиликтүү тургундарды түйшөлткөн көйгөйлөрдү угуп, аларды чечүү жолдорун аныктоо болду.

Жолугушуунун жүрүшүндө төмөнкү маселелер көтөрүлдү:

Балыкчы–Барскоон авто жолунда жүргүзүлүп жаткан курулуш иштеринин жүрүшү;

Ички каналдардын абалы;

Таза суу менен камсыз кылуу;

Райондук жана айылдык деңгээлдеги кесипкөй дарыгерлердин жетишсиздиги;

Карьер ачуу (курулуш иштерине керектүү материалдар үчүн);

Жаңы конуштарга жол салуу, электр энергиясын жана ичүүчү таза сууну тартуу маселеси;

Сугат суу жана көпүрө маселеси.

Ар бир маселе боюнча тиешелүү жетекчилер тарабынан түшүндүрмөлөр берилип, айрым көйгөйлөрдү чечүү боюнча конкреттүү тапшырмалар коюлду.

Мындан тышкары:

Зордук-зомбулуктун алдын алуу боюнча түшүндүрүү иштери жүргүзүлдү.

Кыргыз Республикасынын Укук бузуулар жөнүндө кодекси боюнча жана жаңы кабыл алынган айрым мыйзамдар тууралуу маалыматтар берилди.

Жарандарды алдамчылык фактыларынан сактануу (жалган телефон чалуулар, акча котортуу боюнча фейк маалыматтар) боюнча эскертүүлөр айтылды.

Коррупцияга каршы аракеттенүү боюнча түшүндүрмөлөр берилди.

Мындай жолугушуулар эл менен бийликтин ортосундагы байланышты бекемдеп, көйгөйлөрдү ачык талкуулоого жана аларды ыкчам чечүүгө өбөлгө түзөт.

Элибиздин активдүүлүгүнө ыраазычылык билдиребиз!